Avatangiisinut Sunniutaasinnaasunik Naliliinernik (ASN) tamanillu tusarniaanernik ilisarititsineq

Aqutsisoqarfimmi pisortap Najaaraq Demant-Poortip aatsitassarsioqatigiiffiup suliniutissatut nassuiaataasa/suliniutissaasa aatsitassarsioqatigiiffiullu aatsitassarsiornissamini avatangiisinut suniutissartaanik nalilersuinerata (Avatangiisinut Sunniutaasinnaasunik Naliliineq - ASN) inatsisit malillugit tamanut ammasumik tusarniutigineqarnissaannut tunngasut saqqummiuppai.

Najaaqqap tusarniaanerit qanoq aaqqissuunneqarlutillu ingerlanneqarnissaat saqqummiuppai, tusarniaassutit Namminersorlutik Oqartussat tusarniaavianni tamanut saqqummiunneqartartut, tamanillu tusarniaanermit akissutit tusarniaanermit nalunaarusiami qanoq allassimasarnersut. Tusarniaanermit nalunaarusiaq ingerlatseqatigiiffimmit, avatangiisinut aqutsisoqarfimmit ilisimatuussutsikkullu siunnersortinit oqaaseqaateqarfigineqartarpoq.

Uumassusilerituup (biologip) Bjarne Lyberthip suliniutinik annerusunik issittup avatangiisiinik sunniisinnaasunik pilersaarusiornermi innutaasunik peqataatitsinissap qanoq pingaaruteqartiginera nassuiaatigaa. Inuiaqatigiinni inuit amerlasuut pinngortitamiittarmata immamillu inuuniuteqartuullutik innuttaasunik peqataatitsineq pingaaruteqarpoq.

Innuttaasunik peqataatitsinermi suliniutip avatangiisinut kingunerisinnaasai pillugit inuiaqatigiinnut ilisimatitsinissaq qitiutinneqarpoq, tusarniaanerli ilisimatitsissutinik isummanillu assigiinngitsunik tusarniaanissamik imaqarluni. Bjarnep inuiaqatigiinni assigiinngitsunik marlunnik oqaaseqarfiusumi kalaallisut avatangiisilerinermik taaguusersuutit killeqarnerat pillugu tusarniaanernik aaqqissuussinerit ingerlatsinerillu unammillernarsinnaanerat kalaallisoortaanillu saqqummiussinerni nassuiaasseqqissaartarnissap pisariaqassusaa erseqqissaatigaa.

Bjarnep ilanngullugu pisinnaatitaaffiit pisussaatitaaffiillu qanoq imminnut ataqatigiinnerat erseqqissaatigaa, tassa inuiaqatigiit ilisimatinneqarnissartik ASN-imullu isummiuteqarsinnaanertik inatsisit malillugit pisinnaatitaaffigigaat, erseqqissaatigaluguli pisinnaatitaaffik tamanna inuiaqatigiinnuttaaq paasissutissanik pissarsiniarnissamut suliniutillu pillugit ASN-ilianik isummernissamut pisussaaffiliimmat.

Ph.d-p Anna-Sofie H. Skervedalip innuttaasunik peqataatitsineq inuuttaasunillu ataatsimiisitsinerni sunniuteqaqataasartut pillugit ilisimatusaatini saqqummiuppaa.

Nalinginnaasumik innuttaasunik paasissutissiilluni ataatsimiisitsinerit ingerlanneqartarput takiisuunik saqqummiinertalinnik sivikitsuinnarmillu innuttaasunit ataasiakkaanit apeqqusersaarnertalimmik naggaserneqartartunik imaqarlutik. Maannali nutaamik periuseqarlutik ingerlatsisalersut takussaasarput amerliartuinnartut kaffisorniartarfimmi naapinnermut eqqaanartumik nerriviit eqimattakkaarfigalugit periuseqartaleramik ersarittarlunilu innuttaasunik ataatsimiisitsinerni sinaakkusiussat sunniuteqaqataasarnerat, innuttaasut nerriviit ungalullugit ingitikkaanni eqimattani minnerniitsillutik avitseqatigiinnermut peqataalluarsinnaanerusarlutik.

Innuttaasut akornanni avitseqatigiilluarsinnaanermut eqqarsaatigilluakkamillu isummerfiginnissinnaanermut tunngavileeqataasuusoq tassaavoq paasissutissat iserfigiuminarlutillu paasiuminartuunissaat, taamaattorli ASN-inik siunnersuutit takisuut imartuullu taaguutinik tekniskiusunik inuinnarnut erngerluni paasinanngitsut imaqartarlutik.

Anna-Sofie isumaqarpoq oqallinneq aasigiinngissitaarnerulersinniarlugu peqataanissamullu soqutiginnissinnaasut peqataatinniarlugit innuttaasunik peqataatitsinermik paasinnittariaaseq allanngortinneqartariaqartoq. Allaanerujussuarmik nalinginnaanngitsunillu eqqarsartoqarsinnaavoq, taamaalilluni innuttaasut peqataaffigisinnaasaannik ingerlatsinerit peqataaffiginissaat soqutiginarsarnerullugu naleqqunnerulersillugulu. Attaveqatiginneriaaseq allanngortinneqarsinnaavoq allatigullu inuit oqalutsinniarsaralugit, taamaalillutik imartunerusunik oqaaseqaateqarsinnaaqqullugit.

Anna-Sofie malillugu innuttaasunik peqataatitsineq pitsaanerusoq tassaavoq peqataasunut isumalimmik peqataaneq. Innuttaasut sunniuteqaqataanissaat pillugu qanoq naatsorsuuteqartoqarnersoq paasitissallugu pingaaruteqarpoq, taamaattumik innuttaasunik peqataatitsilluni aaqqissuussap pineqartup paasinartumik ersarissumillu siunertalerneqarsimassalluni.